सतना।।कलेक्टर एवं जिला निर्वाचन अधिकारी अनुराग वर्मा ने स्थानीय बघेली भाषा में मतदाताओं के नाम लिखी पाती
प्रिय मतदाता,
जइसन की अपना पंचें जानित हयन कि देश मा लोकसभा का चुनाव होय रहा है। अपने सतना संसदीय क्षेत्र मा मतदान 26 अप्रैल 2024 का होय वाला है। या चुनाव मा अपना पंचन का वोट डारब बहुतय जरूरी है। आपन अपने वोट से अपने समाज, गांव, देश का भला कई सकित है। अपना पंचें जानित हयन कि सतना पहिले एकय जिला रहा है अब येहिन मा मैहर दूसर जिला बन गा है ता अब सतना संसदीय क्षेत्र मा दुई जिला होइगें । अपना पंचें दोउ जिला के मतदाता अउर जउन अपना के परिवार वाले दूसरे जगह में हैं उनहूँ पंचन का बुलवाय के लोकतंत्र के उत्सव मतदान मा बढ़ चढ़ के भाग लेंयका है जइसे हम पचे दशरहा, देवारी, होरी, राखी यासब त्यौहार बड़ी खुशी के साथ मनाइत है वहै मेर से हमहीं पचेन का 26 अप्रैल का आपन आपन वोट डारके या लोकतंत्र के महापर्व का बड़े धूमधाम से मनामय का है।
https://www.instagram.com/p/C5Qr1McPZB8/?igsh=bmM1eTR4b3N5bzg5
अपना पचेन से या अउर कहें का रहा कि सब त्यौहार साल मा एक बार आवत है पय या लोकतंत्र का त्यौहार 5 साल मा आवत है ता एही हमही अउर त्यौहारन के अपेक्षा ज्यादा धूमधाम से मनावय चाही। एहींन से अपने देश का चुनाव करामय वाला आयोग जेही चुनाव आयोग कहत है, उई कहिन हय कि” लोकतंत्र का पर्व, देश का गर्व” या पर्व का मनाय के देश का गर्व बढ़ामय का है।
जइसन कि सबय कोउ जानित हयन कि खुशहाल समाज अउर अपने देश का खुशहाल रखै खातिर एक मजबूत लोकतंत्र की बड़ी आवश्यकता होत है, ऐखे लाने हमही सबका आपन आपन वोट जरूर डारे चाही।
एक बार फेर से अपना पचेन से गोहार हय कि अपना पचें लोकसभा क्षेत्र सतना के मतदान दिनांक 26 अप्रैल 2024 का आपन-आपन बहुमूल्य वोट जरूर डारके अपने लोकतंत्र का मजबूत बनाई ।
